HKI Parbubu Resort Tarutung Timut-1

JAMITA  DI HKI PARBUBU

MINGGU, 20 APRIL 2014

Oleh : St.J.Simatupang,SAg.MPdK

========================================================================

Ul.Apostel 10:34-43. (Jaha Bibel…) 

dilanjutkan dengan  Marende hita: Hangoluan do hataM.

Thema Minggu : Mamaritahon jala Sitindangi Kristus.

1.Pendahuluan:

Ngolu ni hajolmaon namarragam on, sada sihamuliateon ni rohanta do ganup marsada-sada, ala dibagasan ragam ni parngolu on ido tarida angka na uli nadenggan mamuji dohot pasangap goarNa na badia i. Ala i di sude haragamon i, naing ma adong pangkorhon na tu Debata, jala haulion ni Debata pe naeng ma nian tarida tu ngolu ni hajolma on. On ma na gabe sibaritahonon ni angka Ulaon ni Apostel  tu saluhut jolma di hatia i. Paskah naparjolo dibagasan sadarion, naing tarida haradeon ni angka ruas, manjalo jala mamaritahon uhut sitindangi Kristus nasida.

Sungkun-sungkun tu hita :

1)Bohado hita angka ruas manjalo Paskah ima ari haheheon ni Kristus sian namate.

2)Bohado hita gabe sada sitindangi ni Kristus diangka pararathon barita nauli tu saluhut jolma.

Sungkun-sungkun on, molo tarajumi do, tu Minggu Paskah I. Naeng patar nian pangkobasion ta, naing patar nian na gabe sitindangi ni Kristus hita dingolunta, diangka hapapatar ni ngolu marsada-sada. Antong molo songoni ingkon adong do di ganup hita sada kesimpulan natongtong manghirim tu Debata songon na tarsurat di Epistel Buku ni Parpesalmen 118:1 “Mandok mauliate ma hamu tu Jahowa, ai pardenggan basa do Ibana, ai rodi salelenglelengna do asi ni rohana”. Huria ni Tuhan Jesus Kristus, tahalashon ma asi dohot holong ni roha ni Debata dibagasan ngolunta, keluarganta, ndang di bagasan  parkarejoanta si ganup ari laho pararathon, naung hehe Tuhan ta Jesus Kristus sian namate.

2.Refleksi Hidup Keseharian.

·   si Petrus sada  sisean ni Tuhan Jesus na ginjang marroha, pargabus, jala tolu hali ma ibana na menyalkal Tuhan di hati i. Sada si pangarehei do ianggo pangalaho ni si Petrus on. Tangkas do boi tajaha di Buku ni (Lukas 24:34; 1Korintus 15:5). Alani do di ari haheheon ni Jesus sian na mate, di dompakkon Ibana ma bohina tu si Petrus, las disima ibana tarsonggot mamereng Jesus na hehe sian na mate.

·   Songon jolma namangolu hita, da patut do nian adong “ila ni roha”, ala niangka na hurang haporseaon taringot tu Jesus namate jala na hehe Ibana di ari patoluhon.

Alani ma andorang di dompakkon Jesus diriNa tu si Petrus mandok : “Pabangkithon ibana muse na gabe sisean, di sesa dosana jala di jalo dirina gabe parbarita nauli sitindangi Kristus”. Parsaoran naung putus disambung muse dibagasan haradeon ni roha ni si Petrus dohot Jesus Kristus. (Ul.Apostel 10:34 mandok”Dungi mangkuling ma si Petrus ninna ma: Nunga tangkas dapot rohangku, na so si ida bohi Debata”.) Alani hita pe antong ganup ma hita mangkamuliate hon, sude angka pasupasu naung tajalo sian Debata, na gabe jolma hita di habaoran ni angka pasupasu lumobi mai di angka tugas-tugas na pinasahat ni Debata tu saluhut ruas ni huriaNa

·   Di Ayat 35 mandok “Sian ganup bangso do tahe jangkononna angka na manghabiari Ibana jala mangulahon hatigoran. Alani hita pe naing ma nian dohot manghabiari Ibana, manjangkon hataNa, jala mangulahon angka na nidokNa. Unang ma adong diganup hita na so rade, na so tama, naso olo jala naso hias rohana manjangkon ari haheheon ni Jesus sian na mate. Molo pe diangka ulaon namarragam di hajolma on, jala dibagasan haradeon do naing patar tarida holong masihaholongan.

·   Dame marhite sian Jesus Kristus ma jongjong di tongatonga ni hita ganup namanghaporseai  Ibana, Tahalashon ma mandok Ibana do Tuhan ni saluhut bangso.

·      Jesus nasian Nasaret na miniahan ni Debata do Ibana, ima marhitehite Tondi Porbadia dohot sude hagogoon, laho patundukkon angka si bolis namarsogo ni roha di Ibana. Patundukkon sude roha ni ganup jolma angka na so olo mangulahon hataNa, gabe marsaringan di roha nang dipingkiran ni hajolma on.

·      Hapapatar ni Jesus hehe sian na mate, gabe bohal ma on di angka pambahenan,haringgason, haradeon jala panghorhon asi dohot holong sian Debata tu Jolma pardosa i gabe jolma si pangaloi di hata ni Debata saluhutna.

·      Pesalmen 118:19 mandok”Ungkap hamu ma di ahu angka bohal hatigoran, hubongoti angka i laho mamuji jahowa”. Alani ma naing ungkap ma nian roha dohot pikiran ta, boasa na boi do di haungkapon i, patar jala bongot dipanjaloon dohot di hatua on gabe batu landasan na tuk mansai balga jala uli nang diangka pangulahonon.

3. Kesimpulan :

1. Di ari haheheon ni Kristus sian na mate, gabe dohot ma hita taruli pasupasu sian Debata.

2. Di ari haheheon ni Kristus sian na mate, gabe adong ma dihita ganup hamubaan ni roha, jala mandok mauliate tu Debata.

3) Di ari haheheon ni Kristus sian na mate, gabe patarma holong marsihaholongan tu ganup hita na sahuria.

Mamaritahon jala Sitindangi Kristus ma hita saluhutna, ari on do na jinadihon ni Jahowa, marolopolop jala marlasni roha ma hita disi. Amen.

Marende hita : Pasupasu hataMi………